(Madda Oduu ABO MOA, 07 Guraandhala 2010) Baqattoota Oromoo biyyoota olla Oromiyaa jiranitti miidhaafi roorroon hammaachaa jiraachuun gabaasamaa jira.
Maddeen keenya odeessa nuuf dabarsaa jiran irraa akka hubatamutti, torbaan darbe kana gaafa 02/04/2010 guyyaa irraa yeroo sa’a jahaa irratti baqataafii sabboonaa Oromoo Ob Abdii Mohamed Adam je’amu hidhattoota taliiga Hargessaatiin ukkaamsamee dhabamsiisamee jira.
Odeessi gama biraatiin nu gahe akka dabalee addeessutti, Abdii Mahaammad Hargeessaa bakka Jijjigaa Yer ja’amutti hidhattooti itti marsuun dhukaasa itti bananii qabanii dhabamsiisanii jiran.
Abba ilmaan afurii Abdii Maammad Adam Hargeessaa keessa bara 12 oliif jiraataa jiru, yoo ta’u, yeroo ammaa kanatti qabamee bakki geeessame hin beekkamiin jira.
Kan biraa namni maqaan isaa Musxafee jedhamus waytuma kana qabamee tumamee harki isaa kan cabe yoo ta’u, moobaayilli isaas irraa fudhatamee akka jiru dhagahameera.
Musxafaan yeroof osoo qabamee hidhattoota waliin deemaa jiruu, Soomaaloonni isaa beekan waan irraa buusaniif, akkasitti duraa baafate jiraatus, jireenya isaa egereef haalli naannoo sanaa abdachiisaa akka hinta’iin odeessa nu dhaqqabe irraa hubatameera.
Sabboontoti Oromoo naannoo sana irraa dhaamsa dabarfataniin, Abdii Mahaammad ukkaamsuufi hidhuun duuba gara mootummaa wayyaaneetti kennuun daraaraa olaanaaf akka saaxil hin baasneef qaama dhimmi ilaallatutti akka isaaniif iyyatamu dhaammatanii jiru. Yeroo ammaa kanattis namoota biraa lama kanneen maqaan isaanii yeroodhaaf hin baramiin qabamanii akka jiran beekameera.
MOA
